mandag 22. februar 2016

Direktesendt radio!

I går var vi gjestar på NRK P1 sitt Søndagsåpent! Det hadde eg aldri trudd eg skulle skrive ... Vi var der for å snakke om det å vere testfamilie for DNT.

No er det direkte.

Korleis hamna vi på direkte radio? Eg fekk fyrst ein mail frå Mari, ei av dei hyggelege jentene vi har kontakt med i DNT, om vi kunne tenke oss å vere med på ei radiosending i løpet av helga. Berre om vi hadde lyst, altso. Mykje kan vere sagt om meg og mine, men særleg redd for merksemd er vi vel ikkje ... Sjølvsagt ville vi vere med på dette!

NRK ringte meg so på torsdag og gjekk gjennom opplegget for sendinga og ga meg spørsmålene vi omtrentleg ville få. Slik at vi fekk stille litt forberedt om ikkje anna. Sendinga er frå Tyholt i Trondheim, so vi skulle vere med frå eit lite studio på Marienlyst. Vi var rett og slett "med oss fra studio i Oslo".

Det var med ei viss ærefrykt og ein liten sverm sommarfuglar i magen at vi parkerte på Marienlyst og fann fram til radioresepsjonen der vi skulle møte opp. Sidan eg er lite glad i å vere for seint ute, blei det litt venting før vi fekk beskjed om å ta heisen opp i andre etasje der vi skulle bli henta av ein teknikar. Mens vi venta såg vi Else Kåss Furuseth og systra Ramona.

Radioresepsjonen.

Venting, del 1.

Eg har aldri vore i eit radiostudio før, so det var moro å få sjå korleis ting fungerar. Vi blei henta av ein mann som styrte teknikken frå eit rom som var fylt av skjermar og knappar og ulike datamaskiner. Teknikaren kunne lett ha vore bror til Jørn Stubberud i Mayhem, og spesielt lik var han på eit bilete av han med langt hår Jesper fann på veggen. Teknikaren kunne avkrefte at dei var brør, men at han syntes det var betre å likne Stubberud enn Michael Bolton som dei fleste andre synest han liknar på ...

Teknisk desk.

Det blir ein del venting som gjest på direktesendt radio. Det er nok NRK vant til, for dei hadde utstyrt det tekniske rommet med ei sofagruppe og kaffemaskin som i tillegg hadde kakao. Det korta ned ventetida litt. Og ikkje minst: roa nervane.

Kakao er jo turdrikk nummer 1 på vinteren!

Agnes lyt få kakao òg. 

Venting, del 2.

Endeleg slapp vi inn i studio 1B og fekk på oss headset. No var vi klare. Programleiar Eirik Kjos dukka plutseleg opp over musikken i øyrene på oss og småprata med oss før vi skulle på. Han var veldig flink og fekk oss alle til å slappe av slik at vi skulle vere klare til action. Då vi faktisk var direkte på radio, gjekk alt so fort at vi ikkje hadde særleg tid til å tenke på å vere nervøse og det heile var egentleg over før vi fekk sukk for oss. Vi trur vi svarte bra på det vi blei spurt om og fekk fram kor mykje vi gler oss til å vere testfamilie for DNT.

Med oss fra studio i Oslo ...

Nok ei ny oppleving for Turpotetene. No har vi faktisk vore på direkte sendt radio i NRK P1. Utroleg moro. Kva blir det neste? Lindmo? Skavlan? Haha:)


No gler vi oss til klatring fyrstkomande laurdag og spesielt til dei fine turane utover året!



søndag 7. februar 2016

Kom deg ut dagen

I dag var det den store Kom deg ut-dagen over heile landet. Vi hadde fått invitasjon til DNT sitt arrangement på Ola Narr. Hadde det berre vore på fredag då det lava ned ... I dag var det regn, eit par raude grader, og litt utriveleg sånn generelt. Men slikt skal jo ikkje stoppe oss! Det ligg no litt sanning i det gamle munnhellet om at det ikkje fins dårleg vêr, berre dårlege klær. Og vi har jo fått so fabelakteg flott og godt nytt utstyr, so her skal det iallfall ikkje stå på det!

Glatt på hålska!

Den gamle hoppbakken på Ola Narr kunne diverre ikkje skilte med særleg mykje snø, men desto meir hålske, og det er jo klart at det må ein prøve. Heldigvis var det bart på venstre side so vi kom oss ganske lett opp. Ikkje overraskande var Agnes den som kasta seg utfor fyrst. Det tok nøyakteg 5 sekund før ho hamna på på ryggen og sklei slik ned resten av bakken. Jesper var like heldig, og han mista til og med GoPro-kameraet av hovudet i det han tok telling. Her var det opp til far og redde både kamera og familieæra! Kameraet blei redda umiddelbart, men korleis det gjekk med familieæra treng vi no egentleg ikkje snakke so mykje meir om ... Iallfall ikkje noko meir enn at hålska i regn blir relativt full av vatn og at vanntette bukser ikkje nødvendigvis held deg tørr om du badar:)


Jesper på veg nedover hålska.

Aktivitetsdagen på Ola Narr var eit samarbeid mellom DNT Oslo og Omegn, Bydel Grünerløkka, Kampen Økologiske Barnebondegård, Deichmanske Bibliotek, Lions og FRIGO. Dei hadde laga litt ulike aktivitetar for born. Det var kanskje mest lagt opp for born under 10, men det var moro lell. Dei hadde blant anna satt opp taubane, natursti, hinderløype og trugeløp. Det er nok mange med meg som ikkje tenker at Turistforeninga har slike aktivitetar i nærområdene. Eg var iallfall positivt overraska over at dei ikkje berre har turar i skog og mark. Det betyr at dei har tilbod til alle, til og med dei som ikkje er like glad i å reise ut av byen.


 Taubana på Ola Narr.


 Pinnebrød på grillen.

Varmen frå bålet varma meir enn pinnebrødene.

I dag gjorde vi ei ny oppdaging; Ola Narr! Denne parken er utan tvil verdt eit besøk når snøen kjem tilbake! Det er alltid moro å lære nye ting om byen vår! Dagens opplegg var i tillegg nok eit døme på at ein ikkje treng å reise på dei lengste turane for å ha det moro ute. Det var òg heilt greit å berre kunne sette seg i bilen og køyre heim til ein varm dusj akkurat når det passa oss!




torsdag 4. februar 2016

Utstyr

I går då vi kom heim frå skule og jobb, venta det to store pappkasser med turutstyr frå Turistforeninga. Julafta!!! Det var veldig moro å opne og sjå kva vi hadde fått og kva vi skal kle oss opp i på turane framover. Vi blei både overraska og glade over alt det fine vi fekk. Vi fekk full bekledning frå Bergans; skaljakker, fleecejakker og turbukser. I tillegg fekk vi godt ullundertøy frå Devold og ordentlege, vanntette fjellsko frå Viking. Og som om ikkje det var nok, fekk Agnes og Jesper kvar sin 18-liters tursekk med drikkesystem, og eg fekk ein god sekk på 48 liter. Det er nok eg som lyt bere dei tyngste børene, gitt. Men det skulle vel berre mangle! Sekkane var frå Bergans. Krona på kle-verket var ullhuer frå Turistforeninga.


Det var likevel ikkje ferdig med dette! I den eine pappkassa låg det òg eit flunkandes nytt GoPro-kamera som vi skal bruke til å filme små snuttar frå turane våre. Her blir det mykje interaktivitet framover, forstår eg.


Vi snakka om kor heldige vi har vore som blei valt til å vere med på dette. Og då vi la oss var vi alle enige om at det hadde vore ein flott dag!

PS1: Det har no blitt lagt ut ein nettsak på nettsidene til DNT om dei fem testfamiliane. Trykk her for å lese saken.
PS2: Testfamiliane har fått ei eiga FB-side som vi oppfordrar alle til å følge. Den finn du her.